जिल्हा प्रशासनाच्या वतीने रविवारी क्रीडा संकुलाच्या मैदानावर मुख्य ध्वजारोहण झाले. यावेळी विविध पथकांचे संचलन झाले. यामध्ये प्रथमताच दिव्यांग विद्यार्थ्यांनी भाग घेत ‘हम भी कुछ कम नहीं’ हे दाखवून दिले. शहरातील ॲड. विजयगोपाल अग्रवाल मुकबधीर विद्यालय व सौ. सुशिलादेवी देशमुख मुलींचे निवासी मुकबधीर विद्यालयातील 64 जणांच्या पथकाने शानदार संचलन करीत उपस्थितांचे लक्ष वेधले. मुलांच्या तुकडीचे नेतृत्व प्रवीण दावलबाजे या विद्यार्थ्यांने तर मुलींच्या तुकडीचे नेतृत्व आदिती यादव हिने केले. जिल्हाधिकारी वर्षा ठाकूर-घुगे, जिल्हा पोलीस अधिक्षक सोमय मुंडे, जिल्हा परिषदेचे मुख्य कार्यकारी अधिकारी अनमोल सागर यांनी या विद्यार्थ्यांना संचालनात सहभागी होण्यासाठी प्रोत्साहन दिले.

समाज कल्याण विभागाचे प्रादेशिक उपायुक्त अविनाश देवसटवार यांच्या संकल्पनेतून हा प्रयोग लातूर विभागात राबविण्यात येत आला. हा उपक्रम यशस्वीपणे राबविण्यासाठी जिल्हा समाज कल्याण अधिकारी संतोषकुमार नाईकवाडी, स्काऊट गाईडचे जिल्हा संघटक डॉ. शंकर चामे, वैद्यकीय सामाजिक कार्यकर्ता राजु गायकवाड, सहायक सल्लागार बाळासाहेब वाकडे, प्रादेशिक उपायुक्त समाज कल्याण विभाग कार्यालयातील लिपीक प्रमोद शिंदे, स्काऊट गाईडचे प्रमुख संघटक महेश पाळणे, क्रीडा शिक्षक प्रशांत कुलकर्णी, नंदकुमार थडकर, नामदेव भालेकर, विशेष शिक्षक प्रवीण कदम, रामेश्वर गवरे, सिंधू इंगळे, मीरा परजणे यांनी परिश्रम घेतले.

पालकमंत्र्यांनीही केले कौतुक

सामान्यांसोबत दिव्यांग विद्यार्थीही या संचलनात हिरीरीने भाग घेतल्याने पालकमंत्री यांनी या विद्यार्थ्यांचे विशेष कौतुक केले. क्रीडा संकुलात ध्वजारोहणावेळी उपस्थित नागरिकांनीही या दिव्यांग विद्यार्थ्यांच्या संचलन कलेला भरभरून प्रतिसाद दिला.